اب اس شہر کو کھلنا ہے

’’اب اس شہر کو کھلنا ہے

 ایم کیو ایم نے تاجر برادری کے مطالبات کی حمایت کردی

سارے قانون توڑ کر کاروبار کھول دیں گے، عتیق میر

کراچی: ایم کیو ایم پاکستان کے کنوینئر خالد مقبول صدیقی نے تاجر برادری کے مطالبات کی حمایت کردی۔

اے آر وائی نیوز کی رپورٹ کے مطابق ایم کیو ایم پاکستان کے کنوینئر خالد مقبول صدیقی نے کہا کہ تاجر برادری اپنی ایس او پیز خود بنا کر فوری اپنے کاروبار کو بحال کرے۔

خالد مقبول صدیقی نے کہا کہ لاک ڈاؤن کا کھیل بہت ہوا اب اس شہر کو کھلنا ہے، ملکی معیشت کو زندہ رکھنے کے لیے کراچی میں تجارتی و کاروباری سرگرمیوں کو بحال ہونا بے حد ضروری ہے۔

سارے قانون توڑ کر کاروبار کھول دیں گے، عتیق میر

دوسری جانب آل کراچی تاجر اتحاد کے چیئرمین عتیق میر نے کہا کہ سارے قانون توڑ کر کاروبار کھول دیں گے، ہمیں اپنے بچوں کی روٹی چاہئے۔

واضح رہے کہ دو روز قبل عتیق میر کا کہنا تھا کہ ہمیں وفاق نہیں بھوک اکسا رہی ہے، اگر لاک ڈاؤن کے معاملے میں سندھ حکومت مایوس کرے گی تو ہم ہر وہ دروازہ کھٹکھٹائیں گے جہاں سے انصاف کی امید ہوگی۔

اس سے قبل چیئرمین بزنس مین گروپ سراج قاسم تیلی نے سندھ حکومت سے 15 رمضان سے لاک ڈاؤن میں نرمی کا مطالبہ کیا تھا۔ اُن کا کہنا تھا کہ کرونا کی روک تھام کے حوالے سے سندھ حکومت کی تمام کاوشیں قابل تعریف ہیں مگر کاروبار ہمیشہ بند رکھنے کے متحمل نہیں ہوسکتے۔

واضح رہے کہ کرونا وائرس کے باعث 22 مارچ سے کراچی سمیت سندھ بھر میں لاک ڈاؤن جاری ہے، چند روز قبل صوبائی وزیر اطلاعات ناصر حسین شاہ کا کہنا تھا کہ لاک ڈاؤن پورے رمضان جاری رہے گا۔